ڈیرہ اسماعیل خان میں سکیورٹی فورسز کا کامیاب آپریشن، دو دہشت گرد ہلاک
ڈیرہ اسماعیل خان: پاکستانی سکیورٹی فورسز نے خیبر پختونخوا کے ضلع ڈیرہ اسماعیل خان میں دہشت گردوں کے خلاف ایک انٹیلی جنس بیسڈ آپریشن میں کامیابی حاصل کی ہے، جس کے دوران دو خوارج دہشت گردوں کو ہلاک کر دیا گیا۔
تفصیلات کے مطابق، بدھ 24 دسمبر کو سکیورٹی فورسز کو ڈیرہ اسماعیل خان کے ذیلی علاقے کلاچی میں دہشت گردوں کی موجودگی کی حساس معلومات موصول ہوئیں۔ معلومات کی بنیاد پر فوری طور پر آپریشن کا آغاز کیا گیا۔ آپریشن کے دوران سکیورٹی فورسز نے دہشت گردوں کے ٹھکانے کو نشانہ بنایا۔ فائرنگ کے تبادلے کے نتیجے میں دو دہشت گرد ہلاک ہو گئے۔
انٹر سروسز پبلک ریلیشنز (آئی ایس پی آر) کے مطابق ہلاک ہونے والے دہشت گردوں میں سے ایک مطلوب دہشت گرد دلاور بھی شامل ہے، جو دہشت گرد سرگرمیوں میں سرگرم اور حکومت کے زیرِ تعاقب تھا۔ دلاور کے سر کی قیمت 40 لاکھ روپے تھی۔ اس سے قبل یہ عناصر سیکیورٹی فورسز کے خلاف کارروائیوں اور بے گناہ شہریوں کے قتل میں ملوث رہے ہیں۔ آپریشن کے بعد موقع سے کثیر مقدار میں اسلحہ اور گولہ بارود بھی برآمد ہوا ہے۔
آئی ایس پی آر نے بتایا کہ مقامی علاقے میں ممکنہ دہشت گردوں کے کسی بھی باقی ماندہ نیٹ ورک کے خاتمے کے لیے کلیئرنس آپریشن جاری ہے۔ فورسز کا کہنا ہے کہ وہ ملک میں استحکام کے عزم کے تحت دہشت گردی کے خلاف اپنی کارروائیاں پورے عزم کے ساتھ جاری رکھیں گی۔
About The Author
